Unknown

Ал өмірде ғашықтық сынынан қиын сын бар ма

— Махаббат, адал сақтай білсең, тот баспайтын, інжу сәулесін құлпырта түсетін бір гауһар тас. Кір жұқтырсаң, ол гауһар тастың қандай қасиеті қалады?

Ғашықтық тек махаббатта ғана еместігіне шек келтірмедім

Дәреже адамға ақыл бермесе де, ақылды болып көрінетін әдет береді деген шын секілді

Аттила, Шыңғысхан, Ақсақ Темір, Наполеон, Гитлердің адам баласына әкелген бақытсыздықтарын төгілген көз жасы арқылы бағаласақ, бүкіл әлем жүзін сел жабар еді. Осының бәріне негіз — адам баласының бірін-бірі аямаушылық, өз басын өктем ұстаудан туған қаныпезерлік, айуандық...

Бақытсыздық қайдан туады?

Адам өз тағдырына өзі қожа дейді кейбіреу, олай болса, бақытсыздық қайдан туады? Кісі өзіне-өзі қастық ойлай ма? Бақытсыз болғысы келе ме? Ауру-сырқау Аяужан сынды кездейсоқ апатқа ұшырау бір басқа. Бұл адамның дегенінен тумайтын бақытсыздық. Бақытсыздықтан гөрі, бұл трагедияға, қайғылы халге ұқсайды. Ал шын бақытсыздық ол бөтен, ол — адам баласының өзі тудыратын жауыздығында, қатыгездігінде... Мансапқорлық, баққұмарлық, осыдан туған жауыздық, жан түршігерлік қатыгездік көне заманнан бастап біздің дәуірімізге дейін бір адамды ғана емес, сан ұрпақты, миллиондаған халықты қан жылатып, бақытсыздыққа ұшыратқан жоқ па?

Бірақ жүрек деген бір асау тұлпар емес пе, оның үркуi де, алып қашуы да жеңіл. Сонда оны немен тоқтатасың? Өз бетімен ала жөнелген жүйрiкке қандай қыл арқаның бар? Қазақ: «Балығы жоқ көл қадірсіз, шөбі жоқ жер қадірсіз, ұяты жоқ қыз қадірсіз, жігері жоқ жігіт қадірсіз» дейді. Тұрақсыз болуы да адамның жігерсіздігінен, табансыздығынан. Сондықтан адам ең алдымен табандылықты арман етуі керек. Сонда сенің махаббатыңды да еш дүлей күш жеңе алмайды. Арамдық та, зұлымдық та. Қыз ұятын сақтаса, жігіт бір мінезділігін сақтауы махаббаттың тазалығына керек қасиет. Сөйтсең ғана махаббат та адал сақталады. Тек сол бір мінезділікке екінің бірінің күші жетер ме?»

Адам неге тұрақсыз болады екен? Жоқ, адам емес, махаббат тұрақсыз секілді... Тұрақсыз затта құн жоқ. Сонда махаббатта да құн болмағаны ма? Жоқ, бұның бәрі де бекер ұғым. Тұрақты адамның махаббаты да тұрақты. Адам өз басының келешегін басқа жәйттен көрмеу керек. Асқар таудың басына ақша бұлттар ұяласа, ал асыл адамның басына айнымас табандылық біту керек. Сонда ғана махаббат тұрақты болады.

Біздің алдымызда қалған арман тек осы ғана. Бұл арманға жететінімізге де мен қатты сенем, өйткені біз шын ғашықтар өтетін сыннан өттік. Ал өмірде ғашықтық сынынан қиын сын бар ма?

Өзімнің осындай ауыр сынды махаббатқа ие болып, оның ауыртпалығын жеңіп шыққаныма қуандым. Дүниедегі ең бақытты адам екенімді ұқтым.